Տեղեկատվական տեխնոլոգիաների ոլորտը ՀՀ տնտեսության ամենաարագ զարգացող ճյուղերից է: 2000 թ. այն կառավարության կողմից հայտարարվել է գերակա ճյուղ, որից հետո մշակվել է ոլորտի ռազմավարությունը, ներդրվել զարգացման հայեցակարգը (2001 թ.), ստեղծվել են ոլորտի զարգացմանը նպաստող մարմիններ՝ Ինֆորմացիոն տեխնոլոգիաների ձեռնարկությունների միությունը (ԻՏՁՄ, 2000 թ.), Տեղեկատվական տեխնոլոգիաների զարգացման խորհուրդը (ՏՏԶԽ, 2001 թ.) և Ձեռնարկությունների ինկուբատոր հիմնադրամը (ՁԻՀ, 2002 թ.): 2014 թ. ընդունվել է «Տեղեկատվական տեխնոլոգիաների ոլորտի պետական աջակցության մասին» ՀՀ օրենքը, որով ՏՏ ոլորտի սկսնակ ընկերություններին, որոնց աշխատակիցների թիվը չի գերազանցում 30-ը, հավաստագիր ստանալու պահից սկզբնական շրջանում 5 տարի ժամկետով, իսկ այժմ տրվում է հարկային արտոնություն՝ շահութահարկի 0% և եկամտային հարկի 10% դրույքաչափերի կիրառման տեսքով: Հատկապես այս օրենքի ընդունումից հետո, նոր ստեղծվող ընկերությունների թվի առումով, ոլորտում էական աշխուժացում է նկատվում։ Ոլորտի տարեկան շրջանառությունը միջինում աճել է ավելի քան 27%-ով՝ հասնելով 922,3 մլն ԱՄՆ դոլարի: